Mae wedi bod yn oes ers i ni gynnal gig fan hyn yn Nhy Tawe serch hyn cafwyd llawer o ddigwyddiadau dros yr Haf

Sesiwn Fawr

Yn ddi-dor ers 1992 mae Dolgellau wedi llwyfannu'r Sesiwn Fawr flynyddol. Yn dilyn dechrau digon bychan mae’r wyl wedi tyfu i fod yn un o brif wyliau cerddoriaeth byd Ewrop. Eleni roedd rhestr o fandiau gwych sef Daniel Lloyd a Mr Pinc, Genod Droog, The Poppies, Gwilym Morus, Mim Twm Llai, Frizbee, Euros Childs i gyd wedi chwarae.

Eisteddfod

Bu mwy na digon o gigs i ddewis wythnos Eisteddfod Abertawe. Perfformiodd bandiau ym Maes B, yn gigs Cymdeithas yr Iaith yn Bar 5 a'r Glamorgan Arms ac ar ein llwyfan ni fel Mentrau Iaith Cymru. Cafwyd perfformiadau gan fandiau fel Tangwystl, Sibrydion, Bob Delyn a'r Ebillion, Mattoidz a llawer iawn mwy.

Gwyl y Macs

Gwyl newydd i’r Sîn roc Gymraeg a gynhaliwyd yng Nghaerfyrddin ar yr 2il o Fedi oedd Gwyl y Macs. Chwaraeodd bandiau fel Y Poppies, Radio Luxembourg, Swci Boscawen, Euros Childs, Kentucky AFC, Texas Radio Band i enwi ychydig. Roedd yr wyl yn llwyddiant ac rydym yn gobeithio fe aiff o nerth i nerth.

Lawnsiad DYC2

CD newydd sbon yn cynnwys 10 cân wedi'u dewis gan y DJ Huw Stephens o Radio 1 a Radio Cymru yw CD Dan y Cownter 2. Cafodd y CD, sy’n cynnwys hip hop, gwerin, roc a phop, ag enwau cyfarwydd megis Radio Luxembourg a’r Sibrydion, ei lansio yn ystod wythnos yr Eisteddfod yn Abertawe. Os nad oes gennych gopi erbyn hyn cywilydd arnoch chi ond peidiwch â phoeni oherwydd mae dal digon o gopïau ar gael am ddim! Cysylltwch â post@danycownter.com